Lənkəranda çoxdan gözlənilən hallabong meyvə ağaclarının nübar məhsulu yığılır. Cənubi Koreyadan gətirilən və ilk dəfə Lənkəranın Sütəmürdov kəndinin 10 hektar ərazisində əkilən bu sitrus meyvələri öz dadı, görünüşü ilə yanaşı, məhsuldarlığı ilə də digərlərindən fərqlənir.
Aqronom Fərman Abdullayev : “Artıq üçüncü ili ağaclarımız nübar məhsulu gətirmiş. Birinci yığımı etmişik. Bildiyiniz kimi bu bitki digər sitrus meyvələrindən müsbət fərqi odur ki, bir neçə dəfə çiçəkləyə bilir. Birinci dərimdə çiçəyin meyvələrin 30-40 faizi yığıldı. İlkin olaraq 2 ton məhsul yığdıq.”
Bir hektar hallabong bağından 35-45 ton meyvə götürmək mümkündür. Həm məhsuldarlığı çox olduğundan, həm də meyvəsi ləzzətli olduğundan sitrus meyvəçiliyində təcrübəsi olan fermerlər hallabong bağlarını daha da genişləndirməkdə maraqlıdırlar. Bu il daha 75 -80 hektarda hallabong bağı salınıb. İndi əsas məsələ digər sitrus meyvələri kimi hallabongu da soyuqdan qorumaqdır.
Briqadir Ziyafət Əliyev: “Hazırda qışa hazırlıq işləri gedir. Qışda qısa müddətdə 6-8 dərəcə şaxtadan qorumaq üçün polietilen örtüklərlə örtülüb. Demək olar ki, onu qurtarmışıq. Karkazın içində şumlama gedir.”
Bu meyvəyə qənnadı, kosmetika, ətriyyat, şirə və şərabçılıq sahələrində də tələbat var. Təsadüfi deyil ki, bu meyvənin yerli əhali arasında ilk tanıtımı Lənkəranda ilk dəfə keçirilən “Çay, çəltik və sitrus” festivalında oldu.
Aqronom Fərman Abdullayev : “Bizim üçündə bir fursət oldu məhsulumuzu orda göstərdik. Bütün iştirakçılar, gələn adamlar həm dadını yoxladılar, həm şirəsindən içdilər. Hamısı da çox razı, müsbət qiymət verdilər.”
Birinci çiçəkləmənin dərimi dekabrın sonuna, ikinci yığım isə marta qədər davam edəcək.