Bir ay evelsi Büyük Onlar qasabasında yaşağan 12 yaşlı Karinanıñ Cumhuriyet bala klinik hastahanesinde vefat etkeni aqqında haber bütün Qırımnı sarsıttı. Qıznıñ anası Lenura Ablâzizovanıñ bildirgenine köre, balasını hastahanege eki kere almağanlar, soñra ağır alda olğanda ihtisaslı tibbiy yardım köstermegenler. Ölüm faktı boyunca cinaiy iş açıldı. Tıpqı böyle facia 2022 senesi Sudaq şeer hastahanesinde yüz berip, ekimlerniñ ehmallığı sebebinden 2 yaşlı Amina Osmanova keçingen edi. Endi 4 yıldan berli onıñ ana-babası adalet içün küreşmekteler.