МОНЬ ВЕЛЕСЭ
Монь велесэ парсеень тикшетне,
Монь велесэ горниповтне сырнень,
Медьарвосо качадыть пекшетне,
Менельтёкшос кепедевить виртне.
Ютан лейга - ведесь пильгень палси,
Ютан вирьга - кирдьсамам килеесь, -
Черьпулозон кундси, теке налкси,
Кенярды сонзэ чувтонь седеесь.
Монь велесэ менелесь маласо,
Пельтне венчекс нурьгить паксянть песэ.
Тесэ кортнить озязт вальмапрясо
Ансяк монень чарькодевикс кельсэ.
Тезэнь валдо эйкакшпингем лиядсь,
Цёковтненень кадовсь седей мором.
А эряви седе вадрясь - лиясь,
Сехте вадря - чачома мастором.
(Людмила Рябова)