कोमळ वाचा दे रे राम। विमळ करणी दे रे राम।।धृ।।
प्रसंग ओळखी दे रे राम। धुर्तकळा मज दे रे राम।।१।।
हितकारक दे रे राम। जनसुखकारक दे रे राम।।२।।
अंतरपारखी दे रे राम। बहुजनमैत्री दे रे राम।।३।।
विद्यावैभव दे रे राम। उदासीनता दे रे राम।।४।।
मागो नेणे दे रे राम। मज न कळे ते दे रे राम।।५।।
तुझी आवडी दे रे राम। दास म्हणे मज दे रे राम।।६।।
संगीत गायन दे रे राम । अलाप गोडी दे रे राम।।धृ।।
धातामाता दे रे राम। अनेक धाटी दे रे राम।।१।।
रसाळ मुद्रा दे रे राम। जाड कथा मज दे रे राम।।२।।
दस्तक टाळी दे रे राम। नृत्यकला मज दे रे राम।।३।।
प्रबंध सरळी दे रे राम। शब्द मनोहर दे रे राम।।४।।
सावधपण मज दे रे राम।बहुत पाठांतर दे रे राम।।५।।
दास म्हणे रे सदगुण धाम। उत्तम गुण मज दे रे राम।।६।।
पावन भिक्षा दे रे राम। दीनदयाळा दे रे राम।।धृ।।
अभेद भक्ती दे रे राम। आत्मनिवेदन दे रे राम।।१।।
तद्रुपता मज दे रे राम। अर्थारोहण दे रे राम।।२।।
सज्जनसंगती दे रे राम। अलिप्तपण मज दे रे राम।।३।।
ब्रम्हअनुभव दे रे राम। अनन्यसेवा दे रे राम।।४।।
मजविण तू मज दे रे राम। दास म्हणे मज दे रे राम।।५।।
।। जय जय रघुविर समर्थ ।।
#karunashtake #upasana #shreeram #ramnamawali #samartha #sajjangad
गायन - स.भ. रवींद्र नरेवाडीकर.
ध्वनिमुद्रण - राघव नरेवाडीकर.