#НартайАралбайұлы #NartayNews #НартайНьюс #nartaynews #Еңбекадамы
🔹Спикер: Бақытжан Мақсатұлы - Ақтау теңіз портының аға стивидоры.
Қазақстан еуразияның төсінде орналасқан ел. Тоғыз жолдың торабында тұрмыз. Сондықтан, біздің транзиттік әлеуетіміз әуелден жоғары. Мысалға, Ақтау мен Құрық теңіз порттарының жалпы өткізу қабілеті бүгінде 21 млн тоннаға жеткен. Олар мұнай құю, астық және басқа да жүктерді ауыстырып-тиеуді қамтамасыз етеді. Сауда флоты танкерлерді, құрғақ жүктерді және контейнерлік кемелерді қамтитын 20 кемеден тұрады. Былтыр теңіз порттары арқылы жүк тасымалдау көлемі 6,5 млн тоннадан асты. Қазіргі уақытта еуропалық елдер бағытында қазақстандық жүктерді экспорттық тасымалдау - басым. Қазақстанның әлемдік мұхитқа тікелей шығатын жолы жоқ, сондықтан біз барлық көлік түрін дамытып келеміз. Оның үстіне жаһандық геосаяси жағдайларға және дәстүрлі сауда жолдарының үзіліп қалуына байланысты балама маршруттарды іздеу қажеттілігі туындап отыр. Транскаспий халықаралық көлік маршруты - осының нақты мысалы. Хош, сол теңіздің толқынына тағдырын байлаған мамандық иелері бар бізде. Өзен жағалағанның өзегі талмас дейміз. Ал теңіз жағалағанның ырыс несібесі де ұшан теңіздей болса керек. Бүгінгі кейіпкеріміз Бақытжан Мақсатұлы Ақтау теңіз портында аға стивидор. Көзін ашып, ес білгелі каспийдің жағасында жүр. Ол үшін теңіздің толқыны жүректің соғысымен бірдей.
Теңізден тереңдік жұғады. Теңіздің төсінде жүрген адамдардың мінезі де сол теңіздің толқынындай қуатты болуы керек шығар. Әйтпесе, екінің бірі теңіз портында жұмыс істей алмас. Қарт каспийдің тулап соғатын толқыны талайды жағаға жығып тастаған. Сондықтан да, теңіз кешкенге өзен сирағынан да келмейді деп жатамыз. Ал, Бақытжан сияқты азаматтар теңізде жүрсе, өзін судағы балықтай сезінеді. Өйткені, олар үшін теңіз өмірдің өрнегі. Теңізге шыққандар ажалдан өздері міңген кеменің қалыңдығындай ғана қашықтықта жүреді. Бұл қауіпті мамандықтардың бірі. Өйткені, теңіз шалалықты, салғыртықты кешірмейді. Кейіпкеріміз Бақытжан бала күннен теңіздің жағасында жүріп, осы мамандықты саналы түрде таңдады. Әуелі елде, кейін Ресейде білім алды. Бірақ, қаншама жылдық тәжірибесі болса да ол әлі күнге дейін теңізгі шықса толқынымен бірге толқиды. Бұл қалыпты дүние, солай болуы да керек. Себебі, теңіздің тынысын шын сезіне білген адам ғана сол теңізбен тағдырын байланыстыра алады.
Сәл тарихта тоқталсақ, Кеңес Одағы ыдырағасын Каспийдің жағасында бірнеше тәуелсіз мемлекеттер пайда болды. Қазір Каспий жағасында орналасқан Иран, Ресей, Әзербайжан, Түрікменстан порттары арасында Қазақстанның Ақтау порты айрықша аталады.Ол кеме тоқтап, жүк тиеліп-түсірілетін көп порттың бірі емес, зор әлеуетке ие көлемді де көшбасшы бекет, тоғыз жолдың торабы, қос құрлықтың танабы дерлік дәліз. Еуропа мен Азия құрлықтарының арасынан ойып тұрып орын тепкен су айдыны нарықтық экономиканың реңін реттеп, ағысын түзеп отыр. Ауданы 390 мың шаршы шақырым, жағалау ұзындығы 7 мың шаршы шақырым болатын, тереңдігі кей жерлерде 1025 метр­ге дейін жететін теңіздің шартты түрде 28-29 пайызы Қазақстанның, еншісінде. Сондықтан, теңіздегі әлеуетімізді одан әрі арттыру үшін, бізді Бақытжан сияқты мамандар ауадай қажет.
“Еңбек адамы" елеусіз қалмасын! Биыл біз тұтас фильмдер сериясын жасауға бел будық. Басты қолдаушымыз AMANAT партиясы. Кейіпкерлеріміз қарапайым қызметкерлер, бірақ үлкен жүректі, еңбекқор, өмірге құштар адал адамдар. Бұған дейін экрандардан тек өнерпаздар мен шенеуніктерді көретін едік. Бұл дұрыс болмады, олқылықтың орнын толтыру керек. Біз соны мойнымызға алдық. Бұйыртса 40 фильм жарыққа шығады. Көріңіздер!
Интаграм: nartay_aralbayu...
Фейсбук: / nartai.sarsengaliyev