Kalvalı Əli Dədənin adı (Kərimov Əli Zülfüqar oğlu, el içində ona "Kalvalı Əli Dədə" deyirlər (1874 -- 1960)) XIX yüzilin sonu, XX yüzilin birinci yarısı peşəkar xalq yaradıcılığının ən görkəmli nümayəndələri ilə bir sırada durur.
O, Qurban Pirimov, Cabbar Qaryağdıoğlu, Seyid Şuşinski, Keçəçi oğlu Məhəmməd, Mirzə Məhəmmədhəsən, Aşıq Ələsgər, Aşıq Hüseyn Bozalqanlı, Aşıq Mirzə Bilal, Aşıq Əsəd, Aşıq Mirzə, Dədə Şəmşir, eləcə də Üzeyir Hacıbəyov, Səid Rüstəmov, Əhməd Bakıxanov, Bülbül kimi görkəmli sənətkarların yaxın dostu və çağdaşı olub.
Əli Dədə zurna, balaban, tütək kimi nəfəsli alətlərdə çox böyük sənətkarlıqla çalmağı bacarıb, eləcə də onların imkanlarını texniki baxımdan genişləndirib.
İlk dəfə olaraq o, zil tembrli zurnanı peşəkar kamera alətinə çevirib.
Ustad təkcə çalğıçı yox, həm də onlarla mahnının yaradıcısı, Azərbaycan milli musiqisinin irəliləməsində önəmli rol oynayan sənətkar olub.
Əli Dədənin çalğısında türkün qədimliyi, döyüşkənliyi görünür, eşidilir, duyulur.
Ustad Əli Kərimov 1874-cü ildə Ağsu rayonunun Kalva kəndində doğulub. 16 yaşından xalq içərisində tanınıb.
Azərbaycan aşıqlarının I və II qurultaylarının iştirakçısı olub.
Böyük Vətən Müharibəsi illərində «Rəşadətli əməyə görə» medalı və «Şərəf nişanı» ordeni ilə təltif edilib. Kalva kənd Mədəniyyət Evinin bədii rəhbəri işləyib.
Hələ sağlığında yaradıcılığı araşdırmaçılar tərəfindən öyrənilib.
1984-cü ildə ustad haqqında Moskvada Bayram Hüseynli və Tahirə Kərimovanın müəllifliyi ilə "Ali Kerimov" adında kitab çap olunub.
Ustad 1960-cı ildə ölüb, sonevi Kalva kəndindədir.