Тазалық - адам баласының күнделікті өміріндегі маңызды қағидалардың бірі. «Тазалық - табалдырықтан басталады», «Тазалық - саулық негізі», «Тазалықтан жан да, тән де тазарады» деген қанатты сөздер кім-кімнің де тазалық сақтауға деген құлшынысын жоя алмасы анық.
Ал, тазалықты сақтау үшін күнделікті тұрмыста пайдаланатын қалдықтарды арнайы орындарға тастау - бұл нағыз жанашырлық іс. Себебі, қазіргі кезде ішіп-желінген азық-түлік, пайдаланылған тұрмыстық заттардың қалдығы бұрынғыдай емес екі есеге өскен. Үй ауласында өртеу қауіпті, ал арнайы қоқыс контейнерлерінде жинау оңай. Бұған тек ықыласыңыз бен ниетіңіз болса жеткілікті.
Таза жерде тұруды бәрі жақсы көреді. Ниет бөлек, бірақ әрекет басқа. Өз ауласына контейнер орнатпай, көпқабатты үйлер арасындағы контейнерге түн ортасында келіп қоқыс тастайтындар да бар екенін естіп жүрміз.
Сонымен сөздің қысқасы, аулаңызда қоқыс тастайтын контейнер бар ма? Жоқ болса орнатуға не кедергі? Тұрғындар тарапынан осы қоқыс контейнеріне байланысты наразы пікірлер неге жиі айтылады? Бұл сұрақтарға жауапты бірге іздейміз.
«Қоқыс контейнерлерімен қамту мәселелері, жеке тұрғын үйлер мен кәсіпкерлік нысан иелерінің сұранысы неге қанағаттандырылмайды?» тақырыбындағы брифинг барысын назарларыңызға ұсынамыз.
Спикерлер Әйтеке би кентінің әкімі Орынбасаров Қайрақбай Жақсыбайұлы және «Қазалы-Көркем-Сервис» ЖШС директоры Тұяқбаев Дәулетбек Махамбетұлы әлеуметтік желілерде қозғалған кейбір сауалдарға жауап берді.