Ұлттық мереке - Республика күніне орай Басықара елді мекенінде тойланған ауыл күні Басықара Құрманұлының 265 жылдығы, мемлекет және қоғам қайраткері Әбубәкір Тыныбаевтың 95 жылдығы және Басықара елді мекенінің құрылғанына 60 жыл толуына арналды.
Биыл ауылға кіре беріс жолдағы апаттық жағдайдағы көпір қайта салынып, ел енді игілігін көргелі отырған газ желісі тартылды. Әйтеке би кенті мен Басықара елді мекені арасындағы жол асфальтталды.
Ауыл орталығындағы саябақ ішінен елді мекен іргетасы қаланған уақыттан бері осы ауылда тұрып, еңбек еткен жандардың есімдері қашалып жазылған ескерткіш-тақта ашылды. Ауыл күніне арналған шара "Басықара - жұмақ мекенім, өзіңді мақтан етемін" атты танымдық кешке ұласты. Ауыл күніне арнайы келген қонақтарға жергілікті өнерпаздар мен "Ар-Дана" әжелер ансамблінің әннен шашу шашып, көтеріңкі көңіл күй сыйлады. Мерекелік бағдарлама аясында ауыл тұрғындары футбол, қол күрес, үстел теннисі, қазақша күрес, арқан тартыс және қой көтеруден өткен сайыстарды тамашалап, жеңімпаздар мен жүлдегер командалар бағалы сыйлықтармен марапатталды.
Мерекелік шара кешке орталық саябақта ауыл өнерпаздарының концерттік бағдарламасымен жалғасты.
#Қазалы