Қазақстанда күнбағыс егетін шаруалар банкрот болудың алдында тұр. Өйткені, көбі былтыр алған өнімдерін әлі күнге дейін сата алмай отырғандарын айтады. Кәсіпкерлер мұны шикізат бағасының екі есеге төмендеп кетуімен түсіндіреді. Сондай-ақ, Үкімет тарапынан бекітілген экспорт салығы жығылғанның үстіне жұдырық болды дейді. Себебі, ішкі нарықта қажет болмаған күнбағысты шетелге де шығара алмай қалған.
Жандос Мұрат бір мың гектар жерге егін егіп, табыс тауып отырған шаруалардың бірі. Ол алқаптың жартысына күнбағыс сеуіп, жылда жақсы өнім алатынын айтады. Бірақ, былтыр Қазақстанда және әлемде өнім молынан шыққандықтан дүниежүзі бойынша шемішкенің бағасы екі есе төмендеп кетті дейді. Мәселен, күнбағыстың бір тоннасы бұған дейін үш жүз мың теңгеге дейін барса, қазір 150 мың теңгеге де сата алмай қалған.
ЖАНДОС МҰРАТ, шаруа:
- Адамдар жұмыссыз қалады. Бұл дегеніміз отбасын асырай алмайды. Және біздің қожалық жабылуға мәжбүр болады. Осы бөлшектер, тракторлар, саймандар, май, жанармай барлығы өте қатты қымбаттап кетті. Былтыр қымбаттағаннан әлі бағасы түспеді. Былтыр рубльге байланысты деп еді. Қазір рубль түсті, саймандар арзандаған жоқ.
Күнбағыс егетін шаруалар осындай қиын шақта мемлекет қолдауына мұқтаж екендерін айтады. Әйтпесе былтыр еккен өнімдерімізді сата алмай, банкрот болудың алдында тұрмыз деп дабыл қағып отыр. Қазір де күнбағыстың құны арзан болғандықтан, көптеген шаруа оны өсіруден бас тарта бастаған. Бұған экспорт салығының қосылуы жығылғанның үстіне жұдырық болды дейді. Сондықтан Үкіметтен қолдау көрсетуді, не баж салығын алып тастауды сұрайды.
СЕРІК БАЙҒАЛИЕВА, «Қазақстан фермерлер одағы» филиалының директоры:
- Біз Ресейдің қасында тұрмыз. Ресейден көп шикізат келеді. Олардың бағасы өте арзан. Неге? Өйткені технология көп... Олардың бағасы төмен болған соң біз олармен бәсеке жасай алмаймыз.
Ал сауда министрлігінің өкілдері былтыр күнбағыстың егістік алқабы 1 миллион гектарға дейін ұлғайғанын айтады. Яғни, шаруалар мемлекет қолдауын пайдаланып, кәсіптерін дөңгелетіп, тиісінше ішкі нарықты қолжетімді шикізатпен қамтып отыр. Бұл өз кезегінде еліміздің азық-түлік қауіпсіздігін қамтамасыз ету үшін маңызды дейді.
ДУМАН МАЛҒАЖДАРОВ, ҚР СИМ сыртқы сауда қызметі департаментінің басқарма басшысы:
- Біз қазір квотаның орнына экспорт салығын енгіздік. Яғни, біз экспортқа тыйым салмаймыз. Баж салығын төлеп сыртқа сата беруге болады. Мұндағы мақсат - шикізат өзімізде қалуы керек. Сонда ғана шаруалардың экспортқа емес, елдің ішінде де өз өнімдерін сатуға мүдделі болады.
Бірақ шаруалар Үкіметтің бұл пікірімен келіспейді. Жағдай осылай жалғаса берсе, күнбағыс өсіретін кәсіпкерлердің қатары күрт азайып кетуі мүмкін дейді.
Бізді әлеуметтік желіде оқыңыздар:
Информбюро 31 / @informburo31kanal
Informburo kz / @informburokz2022
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
Біздің сайт: www.31.kz и www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал