Әл-Фараби атындағы ҚазҰУ Телерадиокешені «Қазақстан музейлері» жобасы аясында Сіздердің назарларыңызға Алматы облысында орналасқан Кеген аудандық тарихи-өлкетану музейі жайлы шағын бейнефильмді ұсынады.
Бейнефильмнің түсірілімі «Рухани Жаңғыру» мемлекеттік бағдарламасы аясында Алматы облысының Кеген кентінде 2018 жылы 29 қыркүйекте жүзеге асты.
Ұзақтығы: 14:58 мин.
Тілі: қазақша
Бүгінгідей жаһандану заманында ел тарихы мен ұлтымыздың өр рухын баршаға паш етіп, тәуелсіздігімізді тұғырлы ету жолындағы жоспарлар мен игі істерді елге таныту маңызды міндеттің бірі. Осы орайда халқымыздың сан ғасырлардан сыр шертетін тарихын, өмір жолын кейінгі ұрпаққа танытуда музейлердің алар орны ерекше.
Бүгін біз Жетісу жеріндегі тарихи құндылықтарға бай өлке - Кегеннің аудандық тарихи-өлкетану музейі жайлы әңгімелейтін боламыз.
Меруерт ҰРЖІГІТОВА, зал таныстырушысы
Құрметті қонақтар, біздің музейімізге қош келдіңіздер! Біздің музей 1987 жылы тарихи-этнографиялық музей болып құрылған болатын. Кейіннен атауы Райымбек аудандық тарихи-өлкетану музейіне өзгертілді. Ал қазіргі таңда екі ауданның бөлінуінің нәтижесінде Кеген аудандық тарихи-өлкетану музейі болып өзгертілді.
Музей ғимараты жалпы екі қабаттан тұрады, ішкі аумағы 1097 шаршы метр, жалпы алаңы - 1688 гектар. Ғимараттың үстіңгі қабатында 4 экспозициялық зал орналасқан: табиғаты залы, көне және ортағасырлық тарих залы, кеңес дәуірі жылдарындағы тарих залы және тәуелсіздік залы.
Мұндағы музейлік маңызы бар заттар мен материалдардың жалпы саны - 2204, оның ішінде 1920 жәдігер - негізгі қорға, 284 ғылыми көмекші қорға тиесілі. Астыңғы қабатта ғылыми іс-шаралар өткізілетін мәжіліс залы мен қор сақтау бөлмесі және қызметкерлерге арналған жеке кабинеттер бар.
Музейдегі жәдігерлермен танысу кіреберістегі «Мәңгілік өмір ағашы» деп аталатын инсталляциядан басталады. Мұнда жоғары жағында Самұрық құсы бар өмір дарағы бейнеленген. Алтын Самұрық құсы азат елдің асқақ арманы мен биік абыройын айқындайды. Сәл төменірек мәңгілік өмірдің бастауы және кепілі саналатын «өмір дарағы». Ол шекті мен шексіздің, фәни мен бақидың, аспан мен жердің құдіретті де киелі дәнекері.
Үлкен шеңбер - Жер әлемді, ал кіші шеңбер - Қазақ елін білдіреді. Қазақ жеріндегі бірыңғай көгілдір түс - бұлтсыз ашық аспанды, сондай-ақ халықымыздың бірлік пен ынтымаққа адалдығын аңғартады. Ал, таудағы барыс бейнесі ержүректіліктің, тәкаппарлықтың, еркіндіктің белгісі.
Меруерт ҰРЖІГІТОВА, зал таныстырушысы
Жалпы бұл композициямыз Қазақ еліне, қазақ жеріне деген бейбітшілікті тілеп тұрғанын білдіреді. Келесі біздің Табиғат залына жүріңіздер...
#Qazaqstan_muzeileri #AlFarabiUniversity #TRCKazNU
#AlfarabiTV
#Kegenmuzeii
#RuhaniJangyru
#TRCKazNU
#AlfarabiKazNU
#dauryatm