АУЫЗ СУДЫҢ МӘСЕЛЕСІ БІРІНШІ КЕЗЕКТЕ ШЕШІЛУІ ТИІС! Атырау облысы Қызылқоға ауданы Миялы ауылының тұсындағы Қарасу жер асты тұщы су қорындағы Миялы мен Жангелдин ауылдары ауыз суға пайдаланатын 11 су ұңғымасының 3-уі істен шыққаны 2024 жылдың 10 мамырында ұңғымалардың жай күйін зерттей барған аудандық қоғамдық кеңестің мүшелері облыстық мәслихаттың депутаты Қайырбек Баймұратов, аудандық мәслихаттың депутаты Есенбай Нұров және Казсушар РМК қызметкерімен бірге барып анықтадық. 2 ұңғымаға барар 110 мм пластик құбыр үзілген, 2,5 метр тереңдікке көмілген құбыр жаңадан су тасқынынан пайда болған арнаның бойында жатыр. Тұсындағы ток көзі барып тұрған баған қисайып құлап, токтың сымына сүйеніп, жантайып қалған. Оны «Атырау Жарық» АҚ Қызылқоға бөлімшесінің қызметкерлері ток көзінен қәуіпті болған соң ажыратып кеткен. Казсушардың Қызылқоға бөлімше бастығы С. Темірғалиевтің айтуынша 100 метр ұзындықта 110 мм пластик су құбырын жергілікті атқарушы орган алып берер болса және қисайған ток бағанын энергетиктер жөндеп ток көзін қосса 2 су ұңғыманы пайдалануға беруге болады дейді. Биыл Тайсойғаннан тартылып жатқан су құбырын іске қоспаса су мәселесі шешілмейтіні анық байқалады. Сондықтан, ЖАО құбырды жөндеуге қәжетті 100 метр пластик құбырын алып беріп, энергетиктер бағандарын жөндеп берсе қосымша 2 ұңғымадан 30 тонна тәулігіне қосымша ауыз су алған болар едік.