ONE.COM.MT • Ilbieraħ il-poplu għażel u llum l-għażla ta’ Malta saret magħrufa.
Il-Partit Laburista kiseb rebħa kbira f’din l-elezzjoni ġenerali.
Fl-istorja elettorali mill-indipendenza ’l hawn, dik hija l-ikbar rebħa.
Għalhekk Robert Abela ta’ erbgħa u erbgħin sena se jerġa’ jsir Prim Ministru ta’ Malta u kiseb l-ewwel mandat tiegħu, mandat b’saħħtu ħafna.
Id-distakk bejn il-Partit Laburista u l-Partit Nazzjonalista huwa stmat li hu erbgħin elf vot.
Fl-ewwel kummenti, il-Prim Ministru u Mexxej Laburista Robert Abela qal kif il-poplu Malti u Għawdxi għażel li jimxi ’l quddiem lejn futur sabiħ.
F’dan l-ewwel servizz għal-lejla nsegwu l-mumenti importanti tal-jum.
KITBA: EMAN PORTELLI
FILMATI: ONE
Malta flimkien għażlet futur sabiħ.
Il-Partit Laburista rebaħ l-elezzjoni ġenerali tas-26 ta’ Marzu b’maġġoranza assoluta tal-voti u l-akbar rebħa elettorali mill-Indipendenza ‘l hawn.
Dan hekk kif skont ċifri indikattivi mill-Partit Laburista, id-distakk bejn il-Partit Laburista u l-Partit Nazzjonalista huwa ta’ madwar 40,000 vot.
Skont dawn iċ-ċifri, il-Partit Laburista kiseb kważi sitta u ħamsin fil-mija tal-voti, waqt li l-Partit Nazzjonalista kiseb inqas minn tnejn u erbgħin fil-mija tal-voti.
Id-differenza bejn iż-żewġ partiti skont dawn iċ-ċifri hija ta’ ftit aktar minn erbatax fil-mija.
Għall-ħabta tad-disgħa u għoxrin ta’ filgħodu fis-Sala tal-Għadd tal-Voti fin-Naxxar bdew jinqalbu wiċċhom ’il fuq il-poloz tal-voti.
Hawnhekk l-aġenti tal-partiti bdew jieħdu s-samples u mill-ewwel, l-indikazzjonijiet kienu sbieħ mill-Partit Laburista.
Imbagħad kien għall-ħabta tal-ħdax ta’ filgħodu, meta l-Prim Ministru u Mexxej Laburista Robert Abela ħabbar ir-rebħa Laburista, f’kollegament telefoniku fuq ix-xandir nazzjonali.
ROBERT ABELA
PRIM MINISTRU
“L-ewwel indikazzjonijiet huma illi l-Partit Laburista rebaħ b’marġini b’saħħtu. Ilbieraħ il-poplu Malti u Għawdxi għażel li jimxi ‘l quddiem lejn futur sabiħ. Il-mandat li tagħna l-poplu Għawdxi u Malti se nsarfuh f’ħidma aktar qawwija, b’umiltà aktar minn qatt qabel. Minn għada rridu nkomplu lejn it-triq tan-normalità u nkomplu nagħmlu bidliet importanti u nwettqu riformi kbar fi spirtu ta’ għaqda nazzjonali. Fuq kollox Malta hija ta’ kulħadd u għalhekk Malta Flimkien.”
Mat-tħabbira tal-Prim Ministru, is-sala tal-għadd tal-voti mtliet b’ewforija liema bħalha, qalb l-għajjat ta’ Malta, Malta.
Fil-messaġġ tiegħu, il-Prim Ministru Robert Abela appella għar-responsabilità fiċ-ċelebrazzjonijiet u għar-rispett.
Imbagħad għall-ħabta tas-sagħtejn neqsin għoxrin ta’ waranofsinhar, il-Prim Ministru Robert Abela flimkien ma’ martu Lydia Abela żaru s-Sala tal-Għadd tal-Vot, fejn hawnhekk iltaqa’ mal-aġenti tal-partiti fost dellirju ta’ ferħ u sodisfazzjon.