Мобилография - қолданысқа енгеніне 5-6 жыл ғана болған жаңа ұғым. Бұл - кәсіби фото/видео аппараттардың көмегіне жүгінбей, камерасы бар ұялы телефонды қолдану арқылы сапалы бейне жасайтын заманауи мамандық түрі. Ия, мобилографияны бүгінде мамандық деп атауға толық негіз бар. Себебі қазіргі таңда көптеген кәсіпкерлер шығыны көп продакшн емес, аз бюджетпен мобилографқа тапсырыс беріп өз өнімдерін жарнамалауды жөн санайды. Медиа үшін мобилография смартфон арқылы түрлі динамикалық кадрлар мен сәнді фотоларды тым қысқа уақытта түсіріп, оңай монтаждап, контент жасау. Әдетте мұндай видеолардың ұзақтығы 1-2 минуттан аспайды.
Осы ретте, «Жиделіарық» ауылдық клубы Шиелі ауданының құрылғанына 95 жыл толуына орай «Көрікті Шиелім» атты аудандық мобилографтар байқауын өткізді.
Байқауға 15-29 жас аралығындағы 10 мобилограф қатысып, Шиелі ауданының көрікті орындары түсірілген видеолар келіп түсті. Олар байқаудың «Көрікті Шиелім» атты тақырыбын аша біліп, ауданымыздың туристік әлеуеті бар нысандарын көрсетуге тырысты.
Шығармашыл жастардың жұмысын тәжірбиелі сала өкілдерінен құралған арнайы қазылар алқасы саралай келе жеңімпаздарды анықтады. Әділқазылар алқасының құрамында ауданымызға белгілі фотограф Сейтмұратов Бағлан, ауданымыздың белді, белгілі видеооператоры Бегералиев Дархан бар. Қазылар алқасына Б. Қабылұлы атындағы мәдени-шығармашылық орталығы директорының орынбасары Әлішерова Айжан төрағалық етті.
Креативті түсірілім жасап, сапалы кадр жасаған үздіктер төмендегідей.
Бас жүлде - Сағатбекұлы Нұрболат, Көкшоқы шағын ауданы.
1 орын - Дарханұлы Расул, Шиелі кенті
2 орын - Жолшиев Бекболат, Бидайкөл ауылы.
3 орын - Сұлтанахмет Ұлдана, Ақмая ауылы.
Байқауға қатысушылар мен жеңімпаздар дипломдар, алғыс хаттар және бағалы сыйлықтармен марапатталды.
Олар фото-видео өнерін дамытуда Сыр бойындағы аты әйгілі Сайтхасан Хутаев, Кәрібай Келмағанбетов, Болат Омаралиев секілді өнер шеберлерінің ізін жалғай бермек.
Олай болса, байқаудың бас жүлде иегері Сағатбекұлы Нұрболаттың креативті де көркем бейне материалын назарларыңызға ұсынамыз! (Бейнероликтің авторлық құқығы бас жүлде иегері Сағатбекұлы Нұрболаттың меншігінде қалады).