Аты аңызға айналған «Гүлдер» ансамблінің жаңа құрамы өнерсүйер қауымға Алматыдағы Республика сарайында арнайы концерттік бағдарлама ұсынды.
Концертке қазақ эстрадасының әншілері және Қазақстанның Халық әртістері Роза Рымбаева, Мақпал Жүнісова, «TURAN» фольклорлы-этнографиялық ансамблі қатысты.
Ансамбльдің жаңа құрамы “Гүлдердің” шығармашылық мұрасынан үздік туындыларын орындап, көрерменге ұмытылмас кеш сыйлады. Ұзақ жылғы үзілістен соң сахнаға қайта оралған “Гүлдерді” көрерменнің сағына күткені байқалды. Залда ине шаншар бос орын болмады.
Кеш барысында ансамбльдің тарихы мен өнер майталмандары туралы видеоролик көрсетіліп, "Гүлдердің” өнердегі бағындырған биік белестері таныстырылды.
Ансамбль 1968 жылы құрылып, 1969 жылы 29 қазанда сахнаға шыққан. Қазақстанның белгілі әртістері Сара Тыныштығұлова, Роза Рымбаева, Қапаш Құлышева, Қайрат Байбосынов, Айжан Нұрмағамбетова, Мақпал Жүнісова, Нағима Есқалиева, Майра Нүркенова, Жеңіс Ысқақова, Бақыт Шадаева, Бақтияр Тайлақбаев, Сембек Жұмағалиев, Гүлнәр Сиқымбаева, Қанат және Айткүл Құдайбергенов сынды өнер майталмандары шығармашылығын «Гүлдерде» бастады. Алғашқы жетекшісі ҚР халық әртісі Гүлжихан Ғалиева болды.
Айта кетейік, 2022 жылдың тамыз айында Роза Бағланова атындағы «Қазақконцерт» мемлекеттік концерттік ұйымы «Гүлдер» ансамблін жаңғырту жобасын қолға алды. Ұжымға шығармашылық оқу орындарының түлектері алынып, тәжірибелі тәлімгерлер - бас балетмейстер ретінде Анвара Садықова және жобаның көркемдік жетекшісі әрі дирижері Серік Дәулетов шақырылды.
Еске сала кетсек, 1 наурызда елордада аңызға айналған жаңа құрамдағы «Гүлдер» ансамблінің тұсаукесер-концерті өткен болатын.
"Қазақ газеттері" ЖШС Алматы басылымдары редакциясы