Бүгін "Нұр Отан" партиясы облыстық филиалы жанындағы сыбайлас жемқорлыққа қарсы күрес жөніндегі қоғамдық кеңес кезекті отырысын өткізді. Сыбайлас жемқорлыққа қарсы күрес жөніндегі қоғамдық кеңестің күн тәртібінде облыстық мәдениет, мұрағаттар және құжаттама басқармасы басшысының орынбасары Ермұқан Қыдырғали, дене шынықтыру және спорт басқармасының бөлім жетекшісі Роза Шөмекеева өз ведомстволарында жемқорлықпен қалай күресіп жатқанын айтып беруі тиіс еді. Екеуі де отырыста төбе көрсетпеді. Мәдениет басқармасынан бөлім басшысы келген. Қоғамдық кеңес мүшелері оны тыңдаудан бас тартты. Ал, спорттан ешкім келген жоқ. Кеңес алдында сондай-ақ, облыстық жер қатынастары басқармасының басшысы Қабай Сәрсенғалиев та есеп беруі керек болатын. Оның орнына бөлім басшысы Ертай Жаржанов шығып, жер қатынастары саласында көрсетілетін мемлекеттік қызметтер туралы баяндады. Басқармада 11 қызмет түрі көрсетіледі. Жыл басынан бері халыққа 8 мыңнан астам қызмет көрсетілген. Жалпы аумағы 46 гектарды құрайтын 81 жер учаскесі сатылды. Жер қатынастары басқармасының қызметкерлеріне қатысты арыз-шағымдар түскен. Бөлім басшысы оның кейбірінің расталғанын мойындады. Өз қызметіне салғырт қараған 9 маман тәртіптік жауапқа тартылған.
Сайт телеканала www.rikatv.kz/
Twitter / rika_kz
Вконтакте rikatv