XƏZAN LİRİKASI / MM VERSİYASI (FHD)
❤❤❤❤❤❤❤❤❤❤❤❤
Şeirlərimi...
Susqun bir xəyala dalır dərindən,
Darıxır tumarsız saçlarında dən,
Göz yaşı süzülür sətirlərindən,
Həsrətin ağladır şeirlərimi...
Yaşanır sözlərdə sevdamın yası,
Kədər mənaları bağrına basır,
Qara libas geyir hər bir misrası,
Həsrətin ağladır şeirlərimi...
Qəmli bir nəğmədi poetik fonu,
Ayrılıq dərdiylə yükləyib onu,
Nisgilə bağlanır hər bəndin sonu,
Həsrətin ağladır şeirlərimi...
Sirrin anlayanı dəhşət bürüyər,
Tanıyan ruhuna bəlalım deyər,
Duyğusu tükənmir, çətin kiriyər,
Həsrətin ağladır şeirlərimi...
Çəkdiyim əzabı doğması sandı,
Acısı aşiqlik dünyasındandı,
Elə bil canımdan ayrılmış candı,
Həsrətin ağladır şeirlərimi...
Həzin-həzin solur islaq yanağı,
Buraxmır yaxasın hicran sınağı,
Dilindən talenin sitəmi yağır,
Həsrətin ağladır şeirlərimi...
Akifin ürəyi sevəndən bəri,
Yazıldı ömrünün qara günləri,
Yoxdu ovunduran təsəlli yeri,
Həsrətin ağladır şeirlərimi...
Akif Xəzan
Sumqayıt şəhəri
31.12.2021