Қазақстанның халық партиясы өрт сөндірушілердің мәртебесін әскерилермен теңестіруді ұсынып отыр. Депутаттар, төтенше жағдайлар қызметкерлеріне тура әскерилерге жасалған жеңілдіктер болуы тиіс деп есептейді. Яғни, алдымен олардың жалақыларын көтеріп, баспанамен қамту, тиісті үстемақыларын тағайындау қажет. Мәселен, Жамбыл облысындағы жарылыс кезінде қызыл жалынмен арпалысып, он бір әріптесінен айырылып қалған өрт сөндірушілер, қазірдің өзінде бірқатар проблемалар бар деді. Тіпті әскери бөлімдегі апаттан соң өрт сөндіруші болып жұмыс істегісі келетіндер де азайыпты.
Асқар Базарбаев өрт сөндіру қызметінің барлық сатысынан өткен білікті маман. Ол 2001 жылы қалалық өрт сөндіру бөліміне қатардағы маман болып жұмысқа кірген. Содан бері от пен судың ортасында адам өмірін арашалау үшін аянбай еңбек етіп келеді. Айтуынша, бүгінде 20 жыл бұрынғыдай техника ескілігі, жетіспеушілігі секілді қиындықтар болмаса да, шұғыл шешілуі тиіс мәселелер баршылық.
АСҚАР БАЗАРБАЕВ, Тараз қалалық №1 мамандандырылған өрт сөндіру бөлімінің бастығы:
- Қарамағымда 63 бала жұмыс істейді. Соның жартысында өздерінің үйлері жоқ. Олардың айлықтары 130 мыңнан 170 мыңның шамасында. Біраз істеген стаждарымен олар 170 мыңға барады. Енді олардың көбі қалада пәтер жалдап тұрады. Одан басқа жұмысқа келіп, кетуі бар. Соның бәрі қиындық туындайды.
Асқар Қуанышбекұлы қазір бөлімшеде көпқабатты үйлерге шығатын сатылар жоқ дейді. Қолда бары тек 32 метрлік екен. Ол тек жетінші қабатқа дейін ғана көтереді. Ал 47 жастағы құтқарушыларға 10-қабатқа шығу үшін де біршама күш керек. Десе де, өрт сөндірушілер үшін ең үлкен проблема бұл емес. Себебі көп жағдайда зейнетке шыққандардың баспанасы болмайды екен. Міне, осыған байланысты Қазақстан халық партиясының өкілдері өрт сөндірушілердің мәртебесін әскерилермен теңестіруді ұсынып отыр. Депутаттар Асқар Маминге жолдаған сауалдарында төтенше жағдайлар қызметкерлерінің жағдайын жақсартып, зейнет жасын төмендету қажеттігін айтты.
ИРИНА СМИРНОВА, ҚР Парламенті мәжілісінің депутаты:
- Бірінші кезекте өрт сөндірушілердің жалақысын көтеру керек. Себебі олар үнемі қауіп-қатердің ошағында жүреді. Әрі жұмыс кезінде түрлі қиындар кездеседі. Көп жағдайда сулары болмайды, көп қабатты үйлердің маңында көліктерді қоятын тұрақ та жоқ. Сол үшін зейнетке шығу жасын төмендетіп, қосымша үстемақылар тағайындау қажет.
Төтенше жағдайлар министрлігінің мәліметінше, қазір бұл қызметте 3-5 жыл жұмыс істеген «2 сыныпты маманның» айлығы 131 693 теңге құрайды. Ал еңбек өтілі 9-11 жыл болатын «1 сыныпты маман» орта есеппен 154 114 теңге алады. Ал келесі жылдан бастап қатардағы және кіші басшы құрамының жалақысы 3 пайызға өспек. Сол кезде «2 сыныпты мамандардікі» - 135 183 теңгеге, ал «1 сыныпты қызметкерлердікі» - 158 283 теңге болады.
Ресми ақпарат бойынша, биылдың өзінде 1 құтқарушы мен 11 өрт сөндіруші қызметтік бабында қаза тапқан. Оның он бірі Жамбыл облысында болған жойқын жарылыс кезінде көз жұмыпты. Ал 51 өрт сөндіруші түрлі деңгейдегі дене жарақат алған.
Осы мәселеге байланысты біз "Информбюро" жаңалықтарының ютубтағы ресми арнасында "өрт сөндірушілер қанша жалақы алуы керек? деген сауалнама жүргізген едік. Сауалнамаға қатысқан 3 мыңнан астам адамның 72 пайызы өрт сөндірушілер 300 мың теңгеден жоғары айлық алуға лайық деген жауапты таңдаған. Ал, 12 пайызы 180 мың мен 220 мыңның төңірегінде болуы керек деген пікірде. Респонденттің 11 пайызы 260 - 300 мың теңге жетеді деп есептейді. Ал 5 пайызы өрт сөндірушілер 260 мың айлық алуы тиіс деген.
Нұрболат Жаңабекұлы, Дәулетбай Нұрмахан
Бізді әлеуметтік желіде оқыңыздар:
KZread - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#өрт_cөндірушілер #мәртебе #айлық #зейнет_жасы