獨家丨母親節與四大視帝登台 眾人送驚喜令家燕姐感動哽咽
薛家燕早前同四大視帝 羅嘉良 陳展鵬 黎耀祥 馬德鍾 去到新加坡登台，每人都有solo演出環節，家燕姐除咗同藝術學院嘅學生一齊勁歌熱舞外，仲拖埋3歲嘅孫仔Julian一齊上台合唱，而Julian喺台上更亳不吝嗇咁派飛吻同講 I Love You，相當可愛！
適逢開騷嘅日子搭住母親節，大家嘅家人亦都隨團出發過節，而演出當晚四位視帝除咗同家燕姐一齊合唱《真的愛你》外，仲逐一獻花畀家燕姐，令佢相當感動。事後撈家就話獻花呢個idea係佢提出，因為佢覺得家燕姐係一位好偉大嘅母親，好值得大家敬重，而家燕姐都話喺台上嗰刻自己爭啲忍唔住喊呀！
演出後家燕姐做訪問時，就形容四大視帝係新四大天王，而馬德鍾就話今次呢個組合有種家嘅感覺，笑言家係唔應該拆散，要繼續一齊登台。展鵬就話自己睇住三位視帝嘅劇集成長，仲話聽返佢哋唱歌嘅感覺相當滿足，加上見到觀眾嘅反應咁熱烈，好多謝大家嘅支持。
由於今次家燕姐嘅家人同寶貝孫仔亦都有同行，所以完成登台後，佢哋就同埋煎pan一家三口去咗主題樂園玩呀。
#薛家燕 #四大視帝 #羅嘉良 #陳展鵬 #黎耀祥 #馬德鍾 #新加坡 #登台 #母親節 #真的愛你 #主題樂園 #寶貝 #孫仔 #母親 #煎pan #撈家 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞
即刻Follow TVB 娛樂新聞台 Facebook專頁
/ tvbenews
登入myTV SUPER享受睇TVB自製節目7日包括娛樂新聞的免費點播
bit.ly/2TXLlM0