ಇಸಾಯಿಯಾ ೬: ೧-೮
ಅಶುದ್ಧ್ ವೊಂಟಾಂಚೊ ಮನಿಸ್ ಹಾಂವ್ ಆನಿ ದಳ್ಬಾರಾಚ್ಯಾ ಸರ್ವೆಸ್ಪರ್ ರಾಯಾಕ್ ಹಾಂವೆಂ ದೆಖ್ಲೊ
ಉಜ್ಜೀಯಾ ರಾಯಾಚ್ಯಾ ಮರ‍್ಣಾಚ್ಯಾ ವರ‍್ಸಾ ಹಾಂವೆಂ ಸರ್ವೆಸ್ಪರಾಕ್ ಎಕಾ ಊಂಚ್ ಶಿಂಯಾಸಣಾರ್ ಬಸ್ಲಲೊ ಪಳೆಲೊ; ತಾಚ್ಯಾ ನ್ಹೆಸ್ಣಾಚ್ಯಾ ಸೊಗ್ಯಾನ್ ಮಂದಿರ್ ಭರ್‌ಲ್ಲೆಂ. ತಾಚೆವಯ್ರ್ ಆಸ್ಲೆ ಸೆರಾಫೀಮ್; ಹಾಂಕಾಂ ಜಣ್ ಎಕ್ಲ್ಯಾಕ್ ಸ-ಸ ಪಾಕಾಟೆ ಆಸ್ಲೆ: ದೋನ್ ತಾಚೆಂ ಮುಕಮಳ್ ಧಾಂಪುಂಕ್, ದೋನ್ ತಾಚೆ ಪಾಂಯ್ ಧಾಂಪುಂಕ್ ಆನಿ ದೋನ್ ಉಬೊನ್ ವಚೊಂಕ್. ತೆ ಎಕಾಮೆಕಾ ಅಶೆಂ ಮ್ಹಣ್ತಾಲೆ: ಪವಿತ್ರ್, ಪವಿತ್ರ್, ಪವಿತ್ರ್ ದಳ್ಬಾರಾಂಚೊ ಸರ್ವೆಸ್ಪರ್ ದೇವ್. ಸಗ್ಳೊ ಸಂಸಾರ್ ಭರ‍್ಲಾ ತಾಚ್ಯಾ ವಯ್ಭವಾನ್. ತಾಂಚ್ಯೆ ಬೊಬೆಚ್ಯಾ ಆವಾಜಾನ್ ದಾರ್ವಂತ್ ಹಾಲ್ಲೆ ಆನಿ ಮಂದಿರಾಂತ್ ಧುಂವೊರ್ ಭರ‍್ಲೊ. ತೆದ್ನಾ ಹಾಂವೆಂ ಮ್ಹಳೆಂ: “ಹಾಯ್ ಮ್ಹಜೆಂ ಕಟಾ! ಮ್ಹಜೊ ನಾಸ್ ಜಾಲೊಮೂ! ಕಿತ್ಯಾಕ್ ಹಾಂವ್ ಏಕ್ ಮ್ಹೆಳ್ಯಾ ವೊಂಟಾಂಚೊ ಮನಿಸ್ ಆನಿ ಮ್ಹೆಳ್ಯಾ ವೊಂಟಾಂಚ್ಯಾ ಮನ್ಶಾಂಮದೆಂ ಹಾಂವ್ ಜಿಯೆತಾಂ, ಆನಿ ಮ್ಹಜ್ಯಾ ದೊಳ್ಯಾಂನಿ ರಾಯಾಕ್, ದಳ್ಬಾರಾಚ್ಯಾ ಸರ್ವೆಸ್ಪರಾಕ್ ಪಳೆಲಾ.” ತೆದ್ನಾ ಸೆರಾಫಿಮಾಂಮದ್ಲೊ ಎಕ್ಲೊ ವೆದಿವಯ್ಲೊ ಚಿಮ್ಟ್ಯಾನ್ ಕಾಡ್ಲಲೊ ಏಕ್ ಇಂಗ್ಳೊ ಹಾತಾಂತ್ ಘೆವ್ನ್ ಮ್ಹಜೆಶಿಂ ಉಬೊನ್ ಆಯ್ಲೊ. ತಾಣೆಂ ತೊ ಮ್ಹಜ್ಯಾ ವೊಂಟಾಂಕ್ ಲಾಯ್ಲೊ ಆನಿ ಮ್ಹಳೆಂ: “ಪಳೆ, ಹೊ ತುಜ್ಯಾ ವೊಂಟಾಂಕ್ ಲಾಯ್ಲಾ, ತುಜೊ ಆಪ್ರಾಧ್ ಕಾಡುನ್ ಉಡಯ್ಲಾ, ಆನಿ ತುಜೆಂ ಪಾತಕ್ ಭೊಗ್ಸಲಾಂ.” ತೆದ್ನಾ ಸರ್ವೆಸ್ಪರಾಚೊ ತಾಳೊ ಹಾಂವೆಂ ಆಯ್ಕಲೊ; ತಾಣೆಂ ಮ್ಹಳೆಂ: “ಹಾಂವ್ ಕೊಣಾಕ್ ಧಾಡುಂ? ಆಮ್ಚೆಪಾಸತ್ ಕೋಣ್ ವೆತಲೊ?” ಹಾಂವೆಂ ಜಾಪ್ ದಿಲಿ: “ಆಬ್ಳೆ, ಹಾಂವ್ ಹಾಂಗಾ ಆಸಾಂ, ಮ್ಹಾಕಾ ಧಾಡ್.”