ប្លុក - Block នឹកស្នេហាដែលឃ្លាតឆ្ងាយ...
ប្លុក-Block
ពេលខ្លះ ការដែលយើងសម្រេចចិត្តថា Block មនុស្សដែលយើងធ្លាប់ស្រឡាញ់ មិនមែនស្អប់ខឹង ចិត្តដាច់ ឬឈប់ស្រឡាញ់ឡើយ ក៏ព្រោះយើងដឹងថា អ្វីៗវាលែងដូចមុន មិនអាចទៅរួច គេលែងនៅទីនេះដូចមុនហើយ មានតែព្យាយាមកាត់ចិត្តដោយប្លុកគេចោល បង្រៀនខ្លួនឯងឱ្យក្លាហាន តែតាមការពិតលួចយក facebook ផ្សេងទៀត ទៅមើលគេញឹកញាប់។
ក្នុងចិត្តចង់ស្អប់គេ ចង់ខឹងគេ ចង់ឈប់ស្រឡាញ់ តែចិត្តមួយនេះវាធ្លាប់តែល្អរហូតក្លាយជាទម្លាប់ មិនអាចស្អប់គេបាន មិនអាចខឹងគេបានយូរ។ មនុស្សធ្លាប់ស្រឡាញ់ប្រែមកជាសត្រូវរបស់បេះដូង នឹកដល់ពេលណាបេះដូងលោតខុសធម្មតាពេលហ្នឹង ចង្វាក់បេះដូងលោតចេញអនុស្សាវរីយ៍ល្អៗដែលមានជាមួយគ្នា រូបថតដែលថតពីរនាក់... ដិតដាមខ្លាំងណាស់ ក៏ឈឺមិនធម្មតាដែរ ខំធ្វើខ្លួនពូកែកាត់ចិត្តពីគេ ប្លុកគេ តែតាមការពិតគ្រាន់តែចង់បន្លំការស្រឡាញ់ដែលមានចំពោះគេតែប៉ុណ្ណោះ។
ប្រហែល...ពេលនេះគេកំពុងគិតថា ខ្ញុំមិនបានស្រឡាញ់គេទៀតទេ លែងមានគេក្នុងចិត្តទៀតហើយ ស្អប់ខឹងគេហើយ លែងដូចមុនហើយ ទើបប្លុកគេចោលបែបនេះ ហាហា... នរណាទៅដឹងថា អ្នកដែលប្លុកគេ ក៏ជាមនុស្សតែម្នាក់ ដែលនៅមានគេគ្រប់ពេល គ្រប់ការចងចាំ។ សំណេរនេះមិនមែនជារឿងប្រលោមលោកអីទេ តែវាជាការពិត ពិតដូចមិនពិត ហើយមិនពិតខ្លះដូចពិត វាដូចការស្រឡាញ់របស់យើង ដែលមានចំពោះគេ តែបើដឹងថា គេលែងនៅទីនេះទៀត បើទុកឱ្យនៅ ឃើញគេរាល់ថ្ងៃបែបនេះ បេះដូងវាកាន់តែឈឺ កាន់តែផ្សារ កាន់តែឯកា និងកាន់តែកណ្ដោចកណ្ដែងក្នុងផ្សែងដែលគ្មានភ្លើង។
អ្នកទៅអាចឈឺចាប់ជាងអ្នកនៅ បើអ្នកនៅគ្មានចិត្តចង់នៅ ឬនៅមិនដូចមុន។ រាល់ការចាកចេញសុទ្ធតែត្រូវការលះបង់ខ្ពស់ ត្រូវការការតាំងចិត្តខ្ពស់ ហ៊ានអារសាច់សម្រក់ឈាមខ្លួនឯង វះពោះហែកបេះដូងខ្លួនឯង ក៏ព្រោះតែដឹងថា ទីនេះ កន្លែងនេះ ពេលនេះ មិនមែនជាកន្លែងសម្រាប់យើងទៀតឡើយ៕
ស្នេហា & គ្រួសារ
Rothaya Brand Cambodia