Дүйсенбі күні екі ай бойы Қазақстан халқы ғана емес, алыс-жақын шетелдіктер күн сайын тікелей эфирден үзбей бақылап отырған Бишімбаев ісіне нүкте қойылды. Алқабилер Қуандық Бишімбаев пен оның інісі Бақытжан Байжановқа қатысты үкім шығарды. Экс-министр 24 жылға, ал Байжанов 4 жылға бас бостандығынан айырылды.
Дегенмен енді жұртты «Бишімбаевтың шартты түрде мерзімінен бұрын бостандыққа шығуына мүмкіндігі бар ма?» деген сұрақ мазалағаны жасырын емес. Өйткені алғаш рет темір торға тоғытылған кезде экс-министр жазасының жартысын да өтеместен түрмеден шығып кеткені ел есінде. Осы жолы ол мерзімнің үштен екі бөлігін отырып шыққасын, яғни кемінде 16 жыл өткен соң ғана өтініш білдіре алады. Оның өзінде түпкілікті шешімді сот қабылдайды, Салтанат Нүкенованың туыстарының келісімі де ескеріледі. Сенатор Амангелді Төлемісов оған дейін заңнамаға өзгеріс енгізіліп, ерте шығу мүмкіндігі болмай қалуы да әбден ықтимал деп есептейді. Не де болса, Қуандық Бишімбаев бостандыққа шыққанда жасы 68-ге келеді, сондықтан оған тағайындалған жазаны өмір бойына бас бостандығынан айырумен пара-пар деуге болады.
Жоғарғы соттың мәліметінше, жалпы осы сот отырысынан 48 рет тікелей трансляция жүргізілген. Оның жалпы ұзақтығы 119 сағаттан асқан екен. «Washington Post», «Associated Press», «Daily Mail», «BBC» секілді іргелі шетелдік басылымдар да Бишімбаев сотынан тікелей эфир жүргізіп, материалдар жариялап отырды. Процесс барысын көршілес елдерді қоспағанда, АҚШ, Ұлыбритания, Австралия, Оңтүстік Кореядан бастап, Бангладеш, Польша, Үндістанға дейін көптеген елдің тұрғындары қарап отырды.
Салтанат ісі зәбір көріп жүрген басқа әйелдерге үміт отын сыйлағандай. Қазақстанның Біріккен Араб Әмірліктеріндегі елшілігінің кеңесшісі Сәкен Мамаш әйеліне 10 жыл бойы күш көрсететіні, тіпті жұбайының әпкесіне де қол көтергені туралы ақпарат тараған еді. Бұл факті бойынша қылмыстық іс қозғалып, дипломат елге қайтарылды.
Тағы бір резонанс тудырған оқиға Атырау облысында болды. Мақат ауданы әкімінің бұрынғы әйелі 11 жыл отасқан отағасы мас күйінде балаларының көзінше сабайтынын жайып салды. Қылмыстық іс сотқа жіберілді.
Telegram Qaz - t.me/QazAqparat_kz
Telegram Rus - t.me/kazinform_news
Instagram - / @kazinform_kz
Instagram - / @kazinform
Facebook - / @Kazinform
Facebook - / @Казинформ
Jibek Joly online: jjtv.kz/kk/live
Cайт - kaz.inform.kz/
#kazinform #қазақпарат #Жаңалықтар