Бүгін Қарағанды облыстық әмбебап ғылыми кітапханасында көрнекті қазақ жазушысы Бердібек Соқпақбаевтың 100 жылдығына арналған, «Бір ел - бір кітап» акциясы аясында Қарағанды қаласының колледж студенттері арасында «Балалар әдебиетінің классигі» атты әдеби ринг ойыны өтті.
Әдеби рингке 5 топ қатысты. Төрт кезең бойынша өз білімдерін сынаған топтар «Жазушы келбеті» кезеңінде Б.Соқпақбаевтың өмірі мен шығармашылығы жайлы тест тапсырмаларына, «Көркем шығарма ізімен» кезеңінде «Менің атым Қожа» шығарма желісі бойынша қойылған сұрақтарға жауап берді, «Балалық шаққа саяхат» кезеңінде балалық шағында басынан кешкендерін Бектас бейнесі арқылы көріністер қойды.
Сайысқа тыңғылықты дайындалып келген қатысушылар ойынға белсене қатысып, өздерінің білім деңгейі мен ұшқырлығын, тапқырлығын көрсетті.
Қызу ойынға қатысып, жеңіс тұғырына көтерілген жүзден жүйрік, мыңнан тұлпар болып оза шапқан топтар анықталды:
I-орын Қарағанды жоғары политехникалық колледжінің @qjptk_krg «Жалын» тобы;
II-орын Қарағанды жоғары гуманитарлық колледжінің @humanitariancollegeinkrg «Алау» тобы;
III орын Қарағанды «Bolashaq» жоғары колледжінің @kvkbolashaq «16 жасар чемпиондар» тобы иеленіп, Арнайы дипломдармен марапатталды.
Сонымен қатар Қарағанды машина жасау колледжінің @kgu_kmk «Сұңқар», Тәттімбет атындағы Қарағанды өнер колледжінің @kolledzh_tattimbeta «Кітап патшалығы» топтары алғыс хаттармен және ынталандыру сыйлықтарына ие болды.