Ал шаһарда мұндай сырқатқа шалдыққан бүлдіршіндерді емдейтін оңалту орталығы біреу ғана. Осындай дертпен туылған балаларды емдеп шығуға бола ма?
Наталья Дудченконың 1 жасар баласы Даун синдромымен туылған. «Ұлының мұндай диагнозы бар екенін естігенде төбемнен жай түскендей күй кештім», - дейді.
Ал қазір кеселдің кесірі сезілсе де, қиындыққа қарсы тұратын халге жеткен.
Наталья Дудченко, ата-ана
-Перзентханаларда осындай диагнозбен туылған балаларды тастап кетуді ұсынады. Бірақ дамуы баяу болғанымен, уақытылы емін қабылдаса, кейін жұрт қатарлы өмірге бейімделіп кете алады.
Елордада Платон сияқты ерекше балалардың жан-жақты дамып жетілуіне көмектесу үшін «Күн әлемі» оңалту орталығы жұмыс істейді. Ол «Асыл бала» қауымдастығының қолдауымен ашылған. Мұнда қажетті мамандардың көмегі тегін көрсетіледі.
Жансұлу Бұқабаева, «Күн әлемі» оңалту орталығының директоры
-Біздің орталыққа келу үшін анкета толтыру керек. Сол бойынша кезекке қоямыз. Бір мезетте 30 балаға ем көрсете аламыз. Оңалту курсы 3 айға созылады. Тек Астана бойынша қазір 200-ден астам бала кезекте тұр.
Мұнда қатерлі ісікке шалдыққан балаларға арналған пансионат та іске қосылған. Химия терапия арасында үзіліс жасалады.
Бірақ көбінің денсаулығы ұзақ жолға жарамайды. Сондықтан шалғайдан келген ата-аналар мұнда тегін тұрақтай алады.
Гүлсім Махимова, ата-ана
-Балаларымыздың диагноздары ауыр болғандықтан, үйге қайта алмайтын уақыттар болады. Сол кезде осындай пансионаттың болғаны жақсы.
Айгүл Сәптібаева, «Асыл бала» пансионатының өкілі
-Біздің пансионат 14 орынға есептелінген. Яғни 7 бала анасымен. Қосымша тағы 4 төсек орын қарастырылған. Ауруханада жатқан анаға көмек керек болады. Себебі айлап жатқан оңай емес. Біз сондай адамдарға көмек көрсете аламыз. Яғни толық отбасын қабылдай аламыз.
Соңғы жарты жылда мұнда 100-ге жуық балаға көмек көрсетілген екен. Енді осындай орталықтардың санын көбейту көзделіп отыр.
Авторлары: Зайнұр Байжігіт, Ерсін Мұхамбеталин