Ey teşnə ləbin dilbəri, dildarı, Rüqəyyə,
Zeynəb bibinin həmdəmi, qəmxarı, Rüqəyyə!
İsmin çəkilən anda sənin, titrər ürəklər,
Ah-nalə edər yerdə bəşər, göydə mələklər.
Sınmazmı sənə qalxan o əllər, o biləklər?!
Allah götürərmi elə rəftarı, Rüqəyyə?!
Rəhm etmədilər gözdən axan yaşına bir an,
Gömgöy göyərən, qamçı dəyən qollara qurban.
Sən çəkdiyin ağrı-acıya dözməz hər insan,
Aşuranın azyaşlı fədakarı Rüqəyyə.
Ey Həzrəti-Zəhra gülü, çəkdin nə müsibət?!
Qəm şahısan, ismin tutulur qəmlərə nisbət.
Sən şahi-şəhidan qızı şahzadəsən əlbət,
Yox sən kimi şahzadənin oxşarı Rüqəyyə.
Göz yaşların axdıqca mübarək yanağından,
Ar etdi Fərat ol gecə ətşan dodağından.
Dərd eyləmə, Cənnətdəki Kövsər bulağından,
Su içməyə səslərsən Ələmdarı Rüqəyyə.
Xoş halına, hər kim ki, sevər eşq ilə Həqqi,
Mütləq duyacaq qəlb ilə ruhundakı fərqi.
Aslan ümid eylər, edər aləmdə tərəqqi,
Agahdır ona isminin əsrarı Rüqəyyə.
Tasua günü. 29.08.2020