#Жаңалықтар #Taraz24 #Тараз
Жамбыл облысында 14 су қоймасы халыққа қауіп төндіріп тұр. Егер олардың бөгеттері бұзылса 72 елді мекенді су басып қалуы әбден мүмкін. Ал онда 234 мың астам халық тұрады. Тілсіз жаудан төнетін қауіпті айтқан төтеншеліктер осылай деп дабыл қақты. Олардың қатарында негізгілері «Теріс-Ащыбұлақ», «Тасөткел», «Қақпатас», «Ақкөл», «Ынталы», «Қарақоңыз» және Қырғызстандағы «Киров» су қоймасы.
Талас, Шу және Аса өзендерінің арнасынан асуы аймақтағы апаттың басты себептерінің бірі болуы мүмкін. Сонымен қатар мамандар тау бөктеріндегі елді мекендерде еріген қар мен жаңбыр сулары да жығылғанға жұдырық болатынын ескертеді. Дегенмен, төтеншеліктер топан суды төндіріп қойып, қол қусырып қарап отырмаймыз дейді. Бұл бағытта соңғы үш жылда ұзын саны 33 нысанға 8 млрд теңгеге жуық қаржы қарастырылып, жөндеу жұмыстары жүргізілген көрінеді. Әрине бұл апаттың алдын алу үшін аз қаржы емес.
Жиында жылу мәселесі, православие сенушілерінің мерекесіндегі шомылдыру рәсімдері, іс-шараның реттілігі мен қоғамдық тәртіп жайы айтылды. Сонымен қатар, былтырғы өрт оқиғаларының санын да атап өтті. Өңірде 744 өрт оқиғасы орын алып, қаза болғандар саны 2019-шы жылмен салыстырғанда 70 пайызға артып кеткен.