Мемлекеттің барлық тарихы жастарды отансүйгіштікке тәрбиелеу мен Отан қорғаушылардың жоғары рухын, батылдығын, ерлігін, жауапкершілігін, ұрыстағы беріктігін қалыптастыру міндеттерін табысты шешумен байланысты. Жастарды әскери патриоттыққа тәрбиелеу - азаматтарға патриоттық тәрбие берудің негізгі бөлігі.
Әскери-патриоттық тәрбие беру жастардың саналы сезімін көзқарасын қалыптастырып, Отанымыздың саналы да белсенді күрескерлерін тәрбиелеуге, оларды еліміздің игілігіне жанқиярлықпен еңбек етуге, республикамыздың мүддесін қорғауға жаңа мүмкіндіктер туғызады. Сондықтан қазіргі таңда жас ұрпақты Отанына, халқына, еліне, жеріне деген сүйіспеншілікке тәрбиелеу маңызды рөл атқарады.
Осыған орай, Батыс Қазақстан облысының қоғамдық даму басқармасының қолдауымен «Ғасыр» жастар қоғамдық бірлестігінің ұйымдастыруымен техникалық және кәсіптік білім беру ұйымдарының студенттері арасында «Алау-2023» әскери-патриоттық ойыны оздырылмақ. Ойын барысында колледж студенттері пневматикалық винтовкадан мылтық ату жаттығуын орындау, АК-74 бөлшектеу және жинау нормативін орындау, кермеге тартылу, арқаға жатып дене көтеру, жалпы әскери қорғаныш толымын кию сынды әскери спорт түрлері бойынша сынға түседі.