Հայ ժողովրդական «Հալել եմ եղը» գեղջկական զվարթ պարերգն է՝ «Ակունք» ազգագրական անսամբլի կատարմամբ: Երգի ձայնագրությունը և նկարը վերցված է www.armenianmusic.am/ կայքից: Այս երգը գրանցվել է Եղվարդում՝ Թամար Ալավերդյանից:
Ջահել աղջիկը թեև աշխատում է տանը, յուղ է հալեցրել և լցրել է կճուճը, տարել դրել է մառանում՝ դրա համար հատկացված տեղը, սակայն նրա ուշքն ու միտքը իր սիրած տղայի հետ է: Այս է պատճառը, որ ամբողջ երգի ընթացքում մեկ խոսում է իր աշխատանքի, մեկ էլ իր սիրո մասին:
Այսպես, աշխատանքի ընթացքում իր յարին կարոտած, հիշում է, թե ինչպես էր Ծաղկեվանքի ձորում, երևի տղային թաքուն հետևելիս, կորել խոր-խոր տեղերում (Ծաղկեվանքը գտնվում է Արայի լեռան վրա, մի քարանձավի մեջ): Այնտեղ, զուլալ ջրով մի աղբյուրի մոտ, տղայի քայլած տեղերից ծաղիկներ է քաղել և ամեն տեսակից մեկ-մեկ հատ պահել, որպես նվիրական մի հուշ այդ օրից: Հետո, կարծես թե իր ծնողներին է դիմում, թե տղային տեսեք, աղջկան տվեք: Կարծես թե վստահ է, որ իր սիրած տղան այնքան արժանիքներ ունի, որ ծնողներն առանց վարանելու կհամաձայնեն:
Ապա կանչում է սոխակին ու խնդրում, որ իր համար երգի յարի սիրած երգը, ապա թռչի նրա մոտ՝ երգելու և դրա հետ բարև տանելու սիրած տղային:
Armenian folk song "Halel em yeghy" performs Akounq folk ensemble.
Երգի խոսքերը՝
Հալել եմ եղը, յար ջան,
Հալել եմ եղը,
Լցրել եմ կըճըճները,
Դրել եմ տեղը:
Ծաղկեվանք ձորա միջին,
Հալել եմ եղը,
Ա՜խ, կորա խորա միջին,
Հալել եմ եղը:
Ծաղկեվանք ուխտ եմ արե,
Հալել եմ եղը,
Թաց մազըս ջուխտ եմ արե,
Հալել եմ եղը:
Ծաղիկ ունեմ քաղած է,
Հալել եմ եղը,
Մի-մի հատիկ պահած է,
Հալել եմ եղը:
Պուճուր առուն զուլալ ջուր,
Հալել եմ եղը,
Տըղեն՝ տես, աղջիկը՝ տուր,
Հալել եմ եղը:
Բըլբուլ արի մեր թաղը,
Հալել եմ եղը,
Ասա իմ յարի խաղը,
Հալել եմ եղը:
Խաղի միջով բարևըս,
Հալել եմ եղը,
Հասցըրու յարիս տաղը,
Հալել եմ եղը: