Ақтөбеге еліміздің ең үздік шабандоздары жиналды. Құнан, тоқ, аламан бәйгелер облыстық мамандандырылған балалар мен жасөспірімдер спорт мектебінің алаңында өтті. Тұлпарлар 7 мен 25 шақырым қашықтыққа шапты. Ертемен басталған бәйгеде әуелі 7 шақырымға құнанға мінген шабандоздар шауып өтті. Ипподромды үш рет айналып өткен сәйгүліктердің жылдамдығына көз ілеспейді. 7-ші нөмірде өнер көрсеткен 12 жастағы ақтөбелік шабандоз Әбдумәлік Мақшаның тұлпары бәсекелестерін шаңына да ілестірмеді. Құнан бәйгеге тігілген көлік қанжығада. Бірінен бірі өткен сәйгүліктердің түр-сипатына көз тояды. Әр өңірдің жүйріктері жақсы баппен келген. 16 шақырымға шапқан тоқ бәйге қорытындысы бойынша Түркістан облысынан келген "Бастау" есімді жүйрігімен Жандос Аманжол алғашқы орынға жайғасып, жеңіл көлік иеленді. Аламан бәйгенің басты жүлдесін жерлесіміз Дәулет Ермағамбет "Көкдауыл" есімді жүйрігімен жеңіп алды. 25 шақырымда шашасына шаң жұқтырмамаған "Көкдауыл" иесіне темір тұлпар алып берді. Ат жарысқа барлық облыстан 70-ке жуық шабандоз қатысты.
Сайт телеканала www.rikatv.kz/
Twitter / rika_kz
Вконтакте rikatv