Ақтөбе-Астрахань бағытында салынып жатқан халықаралық жолдың құрылысы дауға айналды. Бүгін маңызды торап ауылдарының қақ ортасымен өтіп жатқан Бестамақ ауылының тұрғындары бас көтерді. Олар 2017 жылы мақұлданып, халықаралық банкпен қаржыландырылып, өткен жылы басталып қойған құрылыс жобасын өзгертуді талап етуде. Алайда 63 миллиард теңге бөлінген 100 шақырым жолдың құрылысы биыл тапсырылуы керек деген жауаптылар жобаға өзгеріс енгізу оңай шаруа емес екенін айтады.
Бұл жолда көлік қозғалысы бір минутқа да тоқтамайды. Өйткені ауылдың қақ ортасын кесіп өтетін халықаралық маңызды торап, Ақтөбе мен Атырау арасын жалғап, одан әрі Астраханьға дейін созылады. Тұрғындар екі жолақтың өзінде мыңдап ағылатын көліктің саны жол төрт жолақты болса, он есеге дейін көбейеді деп отыр. Сөздерінше, қазірдің өзінде ауыл көшесі қауіпті. Балалар еркін ойнаудан қалған. Оның үстіне мыңдаған машинаның түтіні денсаулыққа зиян, экологиялық қауіп деп ашынады ел. Сондықтан, Бестамақ ауылының тұрғындары халықаралық маңызы бар жаңа жолдың ауылдың ортасынан салынуына түбегейлі қарсы.
САЛТАНАТ ЕСІЛОВА, Бестамақ ауылының тұрғыны:
- Неше түрлі өзге ұлт өтіп жатыр. Ертеңгі күні кім кепіл біздің қыздарымыздың аман болатынына? Жолға шығып кетіп тапталып қалмайтынына? Иә ұрланып кетпейтініне? Бүгін жаңбыр болып тұрғасын шаң көрінбейді. Күн ысығанда мына жер көгала көк шаң. Дым көрінбейді. Терезе аша алмаймыз. Балаларды шығара алмаймыз.
АЙСҰЛУ ЖҰМАБАЕВА, Бестамақ ауылының тұрғыны:
- Мына жерде бардак болады. Неге десеңіз біз шыға алмаймыз, кіре алмаймыз. Жол воротаға дейін. Қайдан шығамыз? Төбемен шықпаймыз ғой. Өліп қалған адамымызды қалай шығарамыз? Скорыйда келе алмайды. Осы тұрғанда пожарный вход жоқ.
Тұрғындардың айтуынша, егер жол төрт жолаққа көбейсе, онда асфальт есіктерінің алдына дейін төселеді. Алайда жауаптылар 2017 жылы мақұлданып қойған жобаны қайта өзгерту оңай шаруа емес деп отыр. Ақтөбе мен Атырауға дейінгі 600 шақырымдай жолдың құрылысына жауапты "Қазавтожол" компаниясы биыл маңызды тораптың Ақтөбе мен Қандыағаш арасындағы құрылысын бітіреміз дейді. 100 шақырымды, төрт жолақты жолға қазынадан 63 миллиард теңге бөлінген. Бірақ халықтың қарсылығын ескеріп, көлік жолдары комитеті мен Азия даму банкіне ұсыныс жолдаймыз деп уәде беріп отыр. Ал егер халық ауыл ішіне төрт емес, екі жолақты жол салуға рұқсат берсе жолдың көлемін қысқартамыз дейді. Бірақ ол үшін Бестамақ ауылының тұрғындары бірауыздан келісімдерін беру керек екен.
МАРАТ МАХАМБЕТОВ, "ҚазАвтоЖол" АҚ ҰК Ақтөбе облыстық филиалының директоры:
- Егер ауылдың ішімен екі жолақты жол болып өтетін болса, біз оны тоқтатпай сала береміз. Қазір проблемалық жағдай туындайтын болса бүкіл халықтың ортақ мнениесі керек. Бізге халықтың бөлінгені керек емес. Бізге құжат берсе сол құжатты қарастырамыз. Әзірге тағы да айтамын, жол Бестамаққа дейін келеді. Енді мен жұмысты тоқтатпас үшін Бестамақтан Алғаға қарай салып кете береміз, мына сұрақ шешілгенше. Егер айналып өту керек болса жолдың салынуы тағы 1-2 жылға созылады.
Қазавтожол өкілдері жаңа торап төрт жолақты болса, көлік қатынасының еселеп көбейетінін мойындап отыр. Ал "жол құрылысын бастамас бұрын, ешкім халықпен санаспады" деген тұрғындар егер жауаптылар шағымымызға құлақ аспаса, бала-шағамызбен жолды жабамыз дейді.
Жанар Қожанова, Жомарт Құдайбергенов
Бізді әлеуметтік желіде оқыңыздар:
KZread - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#ҚазАвтоЖол #наразылық