Батпақкөл ауылдық округінде Айшықты баба қорымы қоршалып ас берілді. Аталған іс-шараға аудан әкімі Дархан Ермағанбетов, Айшықты бабаның ұрпақтары, қорымда жерленгендердің жақындары қатысты.
Айшықты баба қорымы ХІХ ғасырдың соңы ХХ ғасырдың басында салынған. Аталған ескерткіш Саға ауылының оңтүстік-батысында Жем өзенінің оң жағалауында, бұрынғы Құлақши елді мекенінде орналасқан. Айшықты баба 1814-1891 жылдары өмір сүрген.
Қорым бірнеше жылдардан бері қоршаусыз болған. Осы істі қолға алғандардың бірі Айшықты бабаның шөбересі Темірхан Есқара. Темірхан ақсақал Айшықты баба қорымының айналасын қоршау үшін қажетті құжаттарын жинақтап, қорымды мемлекет қорғауына алынуына өзіндік үлесін қосқан.
-«Жұмыла көтерген жүк жеңіл» дегендей, ауылға жақын орналасқан «Өріктау Оперейтинг» мекемесі игілікті іске үлестерін қосып қорымның қоршау жұмыстарын толық жүргізді.Қорым қоршауының жалпы ұзындығы шамамен 800 метрді құрайды. Қорымды қоршау жұмыстары өткен жылы қараша айында басталып, 2024 жылдың сәуір айында аяқталды, - деді Темірхан ақсақал.
Іс-шара барысында аудан басшысы Дархан Жанысханұлы Айшықты баба қорымының қоршау жұмыстарына үлестерін қосқан «Өріктау Оперейтинг» мекемесінің ұжымына және атсалысқан азаматтарға алғысын білдірді.
Ас беру барысында Айшықты баба рухына бағышталып құран оқылды, қатысушылар ел ата басынан үлкен рухпен қанаттанып тарасты.