МИНГИ ТАУ/ЭЛЬБРУС-КРАСАВЕЦ
/Кеси джырлаучу, къысхартылыб джыр эбине кеси джарашдыргъан бир тюрлюсю/
Сен кёкге джете мийиксе,
Кавказ тауланы ичинде,
Мияла кибик джылтырай,
Къанга бузларынг юсюнгде.
Юсюнгде барды акъ тонунг,
Сен джай да, къыш да киесе,
Кюн бузулургъа тебресе,
Боран этерге сюесе.
Кюн ариу, чуакъ тургъанлай,
Тохдамайды боранынг,
Джай да, къыш да эримейле,
Юсюнгдеги бузларынг.
Минги тау бла Казбек тау,
Арагъыз - джашил джибек ау,
Сен - кийиз бёркню агъарта,
Ол - беклерине къарата.
Сен - джулдузлагъа джанаша,
Къалгъанла сенден - алаша,
Бир - биригизге къараша,
Къалай сейирсиз, тамаша!
Сенден башха не тауду,
Ариулукъ бла айтылгъан,
Башы къыш болуб, бели джаз болуб,
Этеклеринде джай болгъан?
Тёгерегингде отлайла,
Алтын мюйюзлю кийикле,
Сени тёббенге чыгъалла,
Бёгекле бла джигитле.
Къарны, бузну джыйыучу,
Башынга булут къонуучу,
Тёгерегинге басыныб,
Таулула къараб тоймаучу.
Къыш айланы - бораны,
Джай айланы - салкъыны,
Джумушакълыкъ этмесенг,
Инджитирсе халкъынгы.
Боран ура башынга,
Джылыу тартыб этегинг,
Джан - джанынгдан сылджырай,
Джыйыб тургъан кюртлеринг.
Буз сыртынгдан энелле,
Ёзенлеге сууларынг,
Этегингде айлана,
Киришмюйюз бууларынг.
Къабланларынг, асланынг,
Бугъойлагъа кирелле,
Покунларынг, гуждарынг,
Хар джыйыны билелле.
Айюлеринг мурулдай,
Бёрюлеринг улуучу,
Тюлкюлеринг къанкъылдай,
Кийиклеринг бугъуучу.
Кюн бузулса, сызгъыра,
Этеклеринг джел эте,
Кюн ачылса - джылтырай,
Къарачайгъа кёл эте.
Къабланларынг туралла,
Беклерингде мынгайыб,
Джугъутурунг, турларынг,
Хар шыкъыртха сагъайыб.
Къанкъазларынг къанкъылдай,
Чын тауугъунг джюйюлдей,
Къаргъаларынг къар-къарлай,
Доммайларынг гюрюлдей.
Булбулларынг джырлайла,
Тангынг джангы атханлай,
Маралларынг отлайла,
Гелеулеге батханлай.
Кёгюрчюнюнг юйюрей,
Чаукаларынг кетмейле,
Арарат бла Казбек тау,
Санга тюгел джетмейле.
Къушунг къонуб юсюнге,
Къарауулча къараша,
Отлай къалгъан кийикле,
Чегетингде аджаша.
Турналарынг аусала,
Кюз артында тенгизге,
Къачны джуукъ болгъанын,
Эскертесе сен бизге.
Мамукъ таула джасайды,
Башынгдагъы булутунг,
Бездиргенде, Басханда,
Эштиледи угъултунг.
Кюнюнг ишге талпыта,
Кеченг солуу табдыра,
Санга чыкъгъан батырла,
Халкъны атын айтдыра.
Таджал кибик бир тауса,
Джарылмагъан, чёкмеген,
Боран уруб турса да,
Тик башынгы бюкмеген....
Гараларынг, сууларынг,
Ауругъаннга джарагъан,
Джер суу кёре келгенле,
Бары сени сайлагъан.