Տեսանյութում ներկայացնում եմ 5 տարածված սխալ, որ անում եք լեզուներ սովորելիս, և առաջարկում լեզուներ սովորելու ավելի արդյունավետ տարբերակներ։
Անգլերեն մենախոսությունների համար կարող եք օգտվել այս կայքից՝ www.instantmon...
5.Թարգմանություն
Եթե նոր եք սկսել սովորել օտար լեզուն, ապա հրաժարվեք հնացած մեթոդներից, որոնցից է, օրինակ՝ տեքստեր թարգմանելը: Երբ թարգմանություն եք անում, կենտրոնանում եք ոչ թե օտար, այլ ձեր մայրենի լեզվի վրա, իսկ դա անարդյունավետ է: Թարգմանություններ անելու փոխարեն կարող եք վերցնել փոքր տեքստեր, անծանոթ բառերը դուրս գրել, սովորել ու փորձել կիրառել՝ կազմելով պարզ նախադասություններ: Այդպես դուք ավելի շատ բան կսովորեք, քան որևէ տեքստի վրա տանջվելով ու փորձելով հասկանալի թարգամանություն անել:
4.Լսելով ոչ լեզվակրի կատարմամբ երգեր
Երգերի միջոցով անգլերեն սովորելու վերաբերյալ առանձին տեսանյութ ունեմ, որտեղ մանրամասն խոսում եմ տարածված սխալներից: Եթե երգը կատարում է ոչ լեզվակիր, մի փորձեք իրեն նմանակելով երգել: Այդպես հենց սկզբից ձևավորում եք սխալ արտասանություն, որի վրա հետո ստիպված եք լինելու երկար աշխատել: Լսեք լեզվակիրների երգերը, սովորեք երգի բառերը ու փորձեք երգը կատարել նույն ակցենտով ու շեշտադրումներով:
3.Չեք նմանակում
Ցանկացած լեզու սովորելու ամենակարևոր բաղադրիչը լեզվակրին նմանակելն է: Ընտրեք մի հետաքրքիր երգչի, բլոգերի կամ որևէ այլ հայտնի մարդու, որը լեզվակիր է, դիտեք նրա հարցազրույցները, նրա մասնակցությամբ տեսանյութեր, որտեղ տվյալ մարդը խոսում է ու փորձեք նմանակել նրան: Փոքր տարիքում ինչպե՞ս ենք սկսում մեր մայրենի լեզվով խոսել. այո, նմանակելով այն մարդկանց, ովքեր մեր շրջապատում են: Նույնը պետք է անել նաև մեծ տարիքում, երբ սովորում ենք նոր լեզուներ:
2.Քիչ եք լսում
Եթե ուզում եք նոր լեզու սովորել, ապա հենց հիմա սկսեք տվյալ լեզվով որևէ բան լսել: Եթ անգլերեն եք սովորում ու եթե կողմնորոշվել եք՝ ամերիկյան, թե բրիտանական անգլերեն եք ուզում սովորել, ապա միացրեք CNN կամ BBC, զբաղվեք ձեր առօրյա գործերով ու ականջի պոչով լսեք: Եթե դուք անընդհատ լսում եք անգլերեն, ապա անգլիախոսների միջավայրում հայտնվելիս՝ ձեզ մոտ դիսկոմֆորտ չի լինի, ձեր ականջն արդեն սովորած կլինի անգլերենին, և անկախ նրանից՝ ինչ մակարդակի է ձեր անգլերենը, կկարողանաք առանց իրար խառնվելու հաղորդակցվել:
1.Չեք խոսում
Երևի ինքներդ էլ գիտեք, որ լեզու սովորելու ամենակարևոր բաղադրիչը խոսելն է: Եթե լավ գիտեք քերականություն, գիտեք լիքը բառեր ու կապակցություններ, բայց չեք խոսում, տվյալ լեզուն երբեք ձերը չի դառնա: Դուք միշտ շփոթվելու եք ու չեք կարողանալու խոսել, երբ դրա անհրաժեշտությունը լինի: Դրա համար եթե չունեք զրուցակից, խոսեք ինքներդ ձեզ հետ: Ձայնագրեք ձեզ, լսեք, նորից ձայնագրեք, շտկեք... Ամեն նոր բառ սովորելիս 10 անգամ լսեք ու կրկնեք, որպեսզի բերանային ապարատը սովորի դրան: Լսեք ելույթներ ու փորձեք ամեն բառը նմանակելով, նույնությամբ կրկնել: Անգլերեն մենախոսություններ գտեք ու սկսեք անգիր անել, կանգնեք հայելու դիմաց ու խոսեք: Խոսելիս՝ չմոռանաք նաև ժեստերի մասին, դրանք նույնպես կարող եք կրկնօրինակել լեզվակիրներից: