Халықты оңтүстіктен солтүстікке көшіру бағдарламасы жалғасуда. Осыған орай бүгін облыс орталығында бос жұмыс орындары жәрмеңкесі өтті. Солтүстік Қазақстан, Павлодар, Абай, Ұлытау өңірлерінен келген арнайы делегация жобаның тиімділігін түсіндіріп, үш жарым мыңдай бос жұмыс орнын ұсынды.
Нұржамал Тәмбетова осыдан 10 жыл бұрын Шымкенттен Солтүстік Қазақстан облысы Мағжан Жұмабаев ауданына көшіп барған. Енді міне бағдарламаның тиімділігін түсіндіріп жүр.
НҰРЖАМАЛ ТӘМБЕТОВА - СҚО ТҰРҒЫНЫ «Бізде адам саны аз болғаннан кейін вакансия өте көп. Бізге жұмыс жасайтын жастар, жас отбасылар өте көптеп керек. Дәрігерлер жетіспейді, полиция қызметкерлері жетіспейді, өрт сөндірушілер өте көп керек. Біз шекара аймағы болғаннан кейін шекарашылар да керек. Сонымен қатар ауылдық жерлердегі мектептерге мұғалімдер керек».
Қызылорда тұрғыны Ғазиз Құттымұратов Павлодар облысына қоныс аударғысы келеді. Сондықтан мамандарға біраз сұрағын қойып, жауабын алды.
ҒАЗИЗ ҚҰТТЫМҰРАТОВ - ҚАЛА ТҰРҒЫНЫ «Қоныстануға байланысты көшіп-қону бойынша қаражат бөлінеді. Адам басына 200-мыңнана аса деді. Сосын барғаннан кейін бір жылдық пәтерімді төлеп береді. 1 жылдың ішінде үй алып жатсам үйімнің 50 пайызын төлеп береді. Одан бөлек диплом бойынша мамандығымызбен де жұмыс береміз деп жатыр. Сол енді осы жәрмеңкеден тағы да мәліметтерді толықтырып алып жатырмын».
Ұсынылып жатқан бос жұмыс орындар көбіне ғылым-білім, денсаулық сақтау, сервистік қызмет көрсету, мәдениет және спорт салалары болып отыр.
ҒАБИТ ЖАҢАБАЕВ - ОБЛЫСТЫҚ ЖҰМЫСПЕН ҚАМТУДЫ ҮЙЛЕСТІРУ ЖӘНЕ ӘЛЕУМЕТТІК БАҒДАРЛАМАЛАР БАСҚАРМАСЫНЫҢ БАСШЫСЫ «Біздегі ең көп мысалы, мұғалімдер бізде өте артық көп, медбикелер көп. Осы салаларда бізде жастар көп та, бірақ біздің аймақта бұл орындар толық. Ал мына солтүстіктен келіп отырған 3500 орынның, 700-і мұғалім, 300-дің үсітінде медиктерге орын бар екен. Осының барлығын түсінідіруге арнайы 29 адам келді солтүстіктен. Сол кісілер барлық түсіндірме жұмыстарын жүргізіп жатыр халық арасында».
Жалпы бұл бағдарлама бойынша соңғы 5 жылда өңірімізден 348 отбасы Солтүстікке қоныс аударған.
ДАНИЯР ЖАНАЛИНОВ - ОБЛЫС ӘКІМІНІҢ БІРІНШІ ОРЫНБАСАРЫ «Қоныс аударғандардың ішінен ЖОО аяқтап, тұрақты жұмысқа орналасқан, мемлекеттен қаржылай қолдау алып, кәсібін дөңгелетіп отырғандар да бар. бұндай қолдау шаралар, қоныс аударуға ниет білдіргендердің барлығына көрсетілетін болады».
Бос жұмыс орындары жәрмеңкесі әлі де жалғасады. Солтүстіктен келген делегация енді аудан орталығында түсіндірме жұмыстарын жүргізбек.
Сайт - qyzylordatv.kz/ru/live
Facebook - / qyzylordatv
Instagram - / qyzylordatv
Telegram - t.me/qyzylords_tv
Tiktok - / qyzylorda_tv