АРАЛДА РЕСПУБЛИКА КҮНІНЕ ОРАЙ САЛТАНАТТЫ ШАРА ӨТТІ
Бүгін аудандық мәдениет үйінде 25 қазан - Республика күні мерекесіне орай «Қыран елім - Қазақстаным» атты салтанатты шарасы ұйымдастырылды. Ұлттық мерекенің мәні ашылып, отаншылдық дәріптелді. Шараға аудан әкімі Серік Сермағамбетов қатысып, аудан тұрғындарын мерейлі мерекемен құттықтады.
- Баршаңызды еліміздің ұлық мерекесі - Республика күнімен шын жүректен құттықтаймын! Бұл күн Егемен елдің еңсесін тіктеуге үлес қосқан бабалар рухына тағзым ететін, мемлекеттік дамуына еселі еңбек еткен бүгінгі ұрпаққа алғыс білдіретін байырқалы мереке. Еліміз Тәуелсіздік алған соң даму жолында өзіндік орнын айқындады. Әлем аренасында беделді мемлекеттердің біріне айналды. Бұл қол жеткізген жетістіктер жолында Сыр елінің, оның ішінде айдынды Арал ауданының қосқан үлесі зор деп білемін. Өзінің 95 жылдығы мерекесі қарсаңында ауданымыз Қызылорда қаласында өткен «Алтын дән - 2023» салтанатты шарасында екінші рет қатарынан Мал шаруашылығы саласында төрт түлік санының өсу динамикасын қалыптастырған және мал өнімдерін өндіруде жоғары жетістіктерге жеткен үшін «Озат аудан» номинациясымен марапатталды. Бұл әрине аудан халқының ынтымақ-бірлігінің, қажырлы еңбегі мен маңдай терінің жемісі. Теңізді өлкеде жыл басынан барлық сала бойынша даму динамикасы қалыптасып, өз жалғасын табуда. Ынтымақ атты ыстық ұғымды қастерлеген халқымыздың ырысы арта берсін. Баршаңызды тағы да егемендігіміздің бастауы болған ұлттық мереке - Республика күнімен құттықтаймын! Еліміз аман, жұртымыз тыныш болғай! Көк байрағымыз көгімізде желбірей берсін!»-деді, Серік Сағитжанұлы.
Одан соң, мемлекеттік қызметке жаңадан тағайындалған жас мамандар салтанатты түрде ант қабылдады.
Атаулы мерекеде қоғамның түрлі саласында еңбегімен дараланған азаматтар облыс әкімінің және аудан әкімінің «Алғысымен» марапаталды. Сондай-ақ, өңірімізді дамытуға елеулі үлес қосқан бірқатар еңбек ардагерлері мен сала майталмандарына «Арал ауданының Құрметті азаматы» атағы берілді. Мұнымен бірге, шара аясында тиісті министрлік тарапынан денсаулық және орман шаруашылығы саласының ардагерлері мен сала үздіктеріне мерекелік медальдар мен арнайы төсбелгілер табысталды.
Мерекелік кеш мағыналы әрі мазмұнды концерттік бағдарламаға ұласты. Театрландрылған қойылымдар ұсынылып, шежірелі тарихымыздан сыр шертілді. Ұлттық аспаптардан күй күмбірлеп, патриоттық бағыттағы әндер шырқалды.