18 наурыз - "Ұлттық киім" күні аясында Қызылорда облысында "Этно FASHION" облыстық сән үлгісі фестивалі өтті.
Шараға 17 дизайнер-тігінші қатысып, ұлттық киімдер дефилесінде 100-ге жуық модель қыз бақ сынады.
Фестиваль мақсаты - ұлттық құндылықтар мен мәдени-мұраны насихаттау, жергілікті дизайнер-тігіншілердің креативті кластерлік жаңа жүйесін қалыптастырып, жұмысын қолдау. Ұлттық киім түрлерін заман талабына сай этно стильде жаңғыртып, сұранысқа қажет үлгілерінің жаңа нұсқасын ұсыну.
Фестивальге 17 дизайнер-тігінші қатысты. Әр дизайнер екі түрлі киім үлгісін ұсынды. Бірі - күнделікті киетін классикалық стильдегі заманауи этно киім үлгісі, екіншісі - сахналық, сәнді ұлттық киім.
Стиль мен талғамға қарай, дизайнерлер ұсынған ұлттық киімдер бір-бірінен матасы мен тігісі, безендірілуі жағынан ерекшеленді. Мәселен, ши құрақпен безендірілген этношапан, түймелері жылқы сүйектерінен әзірленген заманауи кеудешелер, киізден тігілген шапандар, т.б.
Жалпы, жергілікті дизайнер-тігіншілердің жұмысын ұлттық киімдер дефилесінде 100-ге жуық модель қыз таныстырды.
Мәтін авторы: Рыскелді Жахман
Видео авторы: Махмуд Байходжаев